СВАБОДА

Паўсотні чалавек плывуць па Вяльлі

5 чэрвеня стартавала супольная гістарычная вандроўка беларусаў і літоўцаў па Вяльлі. Пачалася яна ад вытокаў ракі ў цэнтры Беларусі, а скончыцца ўжо ў ліпені ў Коўне, дзе Вяльля ўпадае ў Нёман. 150 гадоў таму гэтым шляхам прайшоў вялікі аматар даўніны й краявідаў граф Канстанцін Тышкевіч, які напісаў па выніках падарожжа кнігу. Нашы сучасьнікі таксама намераныя і кнігі напісаць, і выпусьціць дакумэнтальны фільм.

Склад удзельнікаў увесь час мяняецца – нехта сыходзіць, нехта далучаецца. У сярэднім плыве больш за паўсотні чалавек. У такім складзе яны прайшлі дзяржаўную беларуска-літоўскую мяжу, дзе былі адмыслова абсталяваныя памежныя пасты.

У кожным месцы прыпынку вандроўнікам ладзяцца экскурсіі ды іншыя культурныя імпрэзы.

Агульнае ўражаньне назіральніка супярэчлівае. Два найбольш блізкія мэнтальна народы, якія ніколі не ваявалі міжсобку і 500 гадоў пражылі ў адной дзяржаве – Вялікім Княстве Літоўскім – сёньня апынуліся падзеленымі “бэрлінскай сьцяной”: літоўцы ў Эўразьвязе, беларусы – у нейкім падабенстве СССР. Яны пачынаюць усё горш разумець адны адных, а ў іх размовах усё болей робіцца канфліктных тэм. І вось гістарычнае супольнае падарожжа закліканае хоць крыху супрацьстаяць гэтым нэгатыўным працэсам. У гэтым сэнсе яно адбываецца супраць агульнай плыні.

Матэрыял апублікаваны 1.07.2007 у 17:25. Рубрыка: Ад рэдакцыі. Вы можаце сачыць за водгукамі на публікацыю праз стужку RSS 2.0. Вы можаце пакінуць свой водгук, альбо стварыць трэкбэк на ўласным сайце.