Сярэдні заробак – дзе які?
Суседзі
Як паведаміла Міністэрства статыстыкі й аналізу Беларусі, сярэдні налічаны заробак работнікаў па краіне склаў 617.244 рублі. Гэта меней, чым у леташнім сьнежні (668.049 рублёў) і нават чым у кастрычніку (618.425). У рэальным выражэньні (з улікам росту спажывецкіх цэнаў) заробак зьменшыўся на 4,7% у параўнаньні з кастрычнікам. У валютным эквіваленце сярэдні налічаны заробак работнікаў за студзень 2007 году зьнізіўся да 288,4 даляра ЗША.
Тым часам у суседняй Літве Дэпартамэнт статыстыкі гэтай краіны апублікаваў лічбу сярэднямесячнага заробку ў чацьвертым квартале 2006 г. Ён склаў 1731,3 літа або на 19,1 працэнт болей, чым у апошнім квартале 2005 году. У валютным эквіваленце гэта складае 655 даляраў ЗША. У дзяржаўным сэктары заробак вырас да 1802 літа (+17,5 прац.), у прыватным – да 1687 (+20,7 прац.).
Такім чынам, літоўцы сёньня атрымліваюць больш чым удвая за беларусаў. Пры гэтым камунальныя расходы нашых суседзяў ужо амаль такія самыя, як у Беларусі, а цэны ў крамах у Мінску і Вільні зраўняліся цалкам.
* * *
Дарэчы, Літва — адзіная з былых савецкіх рэспублік, дзе працягваецца працэс кампэнсацыі насельніцтву за страчаныя рублёвыя ўклады. 5-7 сакавіка ў банках Літвы чакаецца неверагодны наплыў кліентаў. У гэтыя дні на рахункі амаль 370 тысяч жыхароў краіны, якія страцілі свае савецкія зьберажэньні, дзяржава перавядзе каля 800 млн. літаў (прыблізна 307,6 млн. даляраў ЗША).
Аглядальнік