Якая падзея 2006 году была, на вашу думку, найменш значнай?
Апытаньне тыдня
Васіль, лекар:
“ВЫБАРЫ ЛУКАШЭНКІ”
Выбары Лукашэнкі Рэспублікі Беларусь. Я маю на ўвазе ня тое, што адбылося пасьля іх, а самі выбары. З заведама вызначаным вынікам.
Андрэй Кудзіненка, кінарэжысэр:
“ВЫСТУП БРАЗЫЛЬСКІХ ФУТБАЛІСТАЎ”
Выступ зборнай Бразыліі на Чэмпіянаце сьвету па футболе. А зь беларускіх падзеяў магу назваць сьвяткаваньне Дня Волі. Мілінкевіч праявіў сябе прыкладна так, як і Ранальдзіньё, ад якога шмат чакалі на тым чэмпіянаце…
Ульяна, настаўніца:
“АДКРЫЦЬЦЁ НАЦЫЯНАЛЬНАЙ БІБЛІЯТЭКІ”
Я жыву ў мікрараёне “Ўсход”. Таму для мяне такой падзеяй зьяўляецца адкрыцьцё Нацыянальнай бібліятэкі. Колькі было помпы і надзіманьня шчок, і што атрымалася? На карцінцы быў шэдэўр з залатога шкла. А атрымаўся помнік слоіку для закаткі агуркоў.
Віктар Шалкевіч, акцёр:
“СКАНДАЛ ВАКОЛ РЭКАНСТРУКЦЫІ ЦЭНТРУ ГОРАДНІ”
Гэты скандал быў разьдзьмуты ў прэсе. Мне вельмі падабаецца тое, што ў Горадні зараз працуе Фарны касьцёл. Адкрыўся цэлы езуіцкі комплекс. І, мне здаецца, грамадзкасьць неінфармаваная. Маса гісторыкаў і археолягаў сачылі за гэтым усім. І тое, што зроблена, мне падабаецца.
Зьміцер, музыка:
“ЗЬЕЗД САЮЗУ КАМПАЗЫТАРАЎ”
Зьезд Саюзу кампазытараў Беларусі. На ім у соты раз пераабралі старшынём Ігара Лучанка.
Лявон Баршчэўскі, літаратар:
“СТВАРЭНЬНЕ НОВАГА САЮЗУ ПІСЬМЕНЬНІКАЎ”
Найменш значнай падзеяй зьяўляецца стварэньне новага Саюзу пісьменьнікаў на чале з Чаргінцом. Гэта абсалютна прагматычная структура, дзе проста разьлічваюць на дзяржаўную датацыю. Творчыя пытаньні там нікога не цікавяць. А тым больш, выхад на нейкую сусьветную арэну. Гэта спроба захапіць касу і падзяліць яе паміж часткай людзей, якія пішуць. Прычым, ня самай лепшай часткай. Такі невялікі абшчак, кажучы крымінальным жаргонам. Праўда, Віктару Шніпу ўдалося выдаць, дзякуючы гэтаму СП, кніжку ў такім афармленьні, у якім яго ніколі не выдавалі. Нешта яму дасталося.
Валянціна, настаўніца:
“ДЗЕНЬ НАРАДЖЭНЬНЯ ПРАВАДЫРА”
Дзень нараджэньня Аляксандра Лукашэнкі. Здаецца, усе ведаюць, калі ён нарадзіўся. У мінулыя гады гэтая сьветлая дата неяк адзначалася. Ці па радыё што скажуць, ці які губэрнатар кветкі падорыць. А сёлета неяк ціха было 30 жніўня. Сьціплы стаў наш правадыр, атрымаўшы пажыцьцёвы тэрмін.
Лявон Вольскі, рок-музыка:
“КОНКУРС “ЭЎРАБАЧАНЬНЯ”
Удзел Беларусі ў конкурсе “Эўрабачаньня” – абсалютна нязначная ні для каго падзея. Пры такой пільнай увазе ўсіх афіцыйных СМІ, яна стала поўным нічым. Альбо ўсе гэтыя дзіцячыя конкурсы “Эўрабачаньня”… У нас да гэтага стаўленьне, як да спорту. Зрэшты, у нас да ўсяго стаўленьне, як да спорту. Да культуры ў тым ліку. Мы будзем скакаць высока і пры гэтым сьпяваць, і тады ў нас усё атрымаецца. А ў выніку нічога не атрымліваецца, і, можа, ня варта гэтым было займацца. І выдаткоўваць такія значныя сумы на ўсё гэта, замест таго, каб займацца рэстаўрацыяй помнікаў культуры – да прыкладу, сярэднявечных замкаў, якія развальваюцца, бо стаяць незакансэрваваныя.
Міхал, студэнт:
“БЕЛКА”, ЯКАЯ ЛЯСНУЛАСЯ”
Самая нязначная падзея сёлета – “БелКА”, якая ляснулася. Гора ад гэтай катастрофы няшмат. І радавацца, здаецца, неяк непрыстойна. Усё ж маглі стаць касьмічнай дзяржавай. А так – палёты да зор адкладваюцца.
Аляксандар, прадпрымальнік:
“ПРАЙГРАНЫ КОНКУРС НА ПРАВЯДЗЕНЬНЕ ХАКЕЙНАГА ЧЭМПІЯНАТУ”
Менск сёлета мог выйграць конкурс на правядзеньне ў Беларусі міжнароднага хакейнага чэмпіянату. Але ня выйграў. Дробязь, вядома, але прыемная дробязь. Няма чаго тут ладзіць вялікія міжнародныя спаборніцтвы.
Анатоль Лябедзька, палітык:
“САМІТ СНД”
Гэта саміт СНД, які праходзіў у Менску. Яго заўважылі толькі аўтааматары, якім цяжка было рухацца па вуліцах сталіцы. Не адпавядае тая рэкляма, якая была, таму, што адбылося падчас гэтай падзеі.